مرحبا بيكم فى بيتي..اتفضلوا
سموا وانتوا بتتدخلوا
ثانية بس انا هافتح الشبابيك واهوي..واهو تنور
دي حيطاني
فيها كام شق انما..ساندة المكان
لونها هادي قديم وباهت
هو ده لوني المفضل من زمان
ودي أرض صلبة
مهما غطاها التراب
مهما تعبتها الرطوبة والعذاب
مهما داست فيها رجل...بتبقى صلبة
قوضتي دى
ودي مراية مكسرة
مابشوفش نفسي ... المعذرة
هقلبها علشانكم كمان
وياريت ماتتخضوش كتير
وادي السرير
نايم على ملايته الفرح
بيقوم يادوبك ساعة بس
ويقضي طول الوقت نوم
بصوا على الحيطة كدة
هتلاقوا صورة للأمل
كل اما ابصيلها كدة
الاقي واد زى العسل
يحضن ايديا...يسكن العالم عينيا
ويجري بيا عالحياة
وبنسعد الناس كلها
ويلاقي مية للأمان
يقوم ساقيني منها
لكنه فجأة بيروح ويسيبني للدموع
لكن بيوعدني برجوع
أسف صحيح
شكلكم جعتوا اوى
عندي حب...مقلي فى زيت الجنون
ولو طلعتوا عطشانين
فيه حنان سكر زيادة
ووهم سادة
طعمه بينسى السنين
في النهاية...إنتوا شرفتوا مكانى
كنتوا أحلى ضيوف عليا
بس صاحب البيت خلاص.....هياخدوا تانى
ليست هناك تعليقات:
إرسال تعليق