أنا بكتبلكم من أوضة ضلمة ، ووحدة عميقة ... أنا ماجربتش عمق المحيط الهادي ... بس أراهنكم انها أعمق وأكبر ... مش عارف أوصفلكم الرعب اللي انا فيه .. انا مرعوب لدرجة اني مش قادر اتحرك واخرج .. رغم ان الباب فوق ايدي ورغم اني عارف اني لو فتحت هلاقي ناس تجري عليا ويغمي عليا والأفلام دي كلها
لا صحيح ، مش عارف ومش متأكد
انا سمعت ان الأكسجين نقصه لمدة 6 ايام بيموت ، وان الجسم أكبر جسم فيكي يا بلد
لو قعد 3 ايام من غير أكل بيودع.
أنا بقالي سبع ايام هنا .. تلاتة بودع ، ونلانة بتحلل ، واديني اهو مش عارف حتى أقول يارب .
أنا بعتلكم يمكن تيجوا تلحقوني .. أمل اللحظة الأخيرة .. نقطة سكر كبيرة .. في حلق كله مرار .. دي من أشعاري على فكرة .
أنا بحب الحياة أوي على فكرة ... بحب أحب وبحب أكره وبكره احب وبكره اكره ..
وبخاف ، بعشق الخوف ..وبحب الكلام ... وبحب اكدب .. وبكره اكدب ، وبعرف كل الألاعيب .. وبحب اختار ، بعرف اختار كويس.
وبقع بمزاجي ، والوقعة كتير بتجري ورايا وبتجيبني غصب عني ، إنسان بقى
هتقولوا اييييه ؟؟
الحاجة الوحيدة اللي بكرهها وعمري ما حبيتها ... المووووووت
بكره الموت .. يمكن من كرهي ليه ، عمل معايا صفقة بالعافية وبالقوة .. قاللي هفصلك توب جميل وانت ما عليك الا تلبسه .. انت اللي هتختار التوب ولونه ونوعه
اللي خلاني ألبس التوب إنه كان منقوش بعدم وجودي .. كان متفصله دراعات بشخصية ملغية .. كل حاجة مهما كانت دناوتها وحقارتها داست عليها.
عارف ممكن يحصل معاك كل ده ويكون عندك حافز ترجع ، عندك أمل تعيش من تاني
ده لو انت بس عرفتلك ضمان حقيقي لرجوعك .
كل حاجة رفضت وانا قبلت الصفقة .. ماكنش ينفع أعيش بعد كل اللي حصل .. ماكنش ينفع أكون هناك في قلب المعمعة .. أصل أنا مش معمعجي .
يمكن كنت محتاج اتعلم ، أكيد كنت محتاج اتعلم .. وما اتعلمتش ..
سبت نفسي للإغراء الموتي ..
أنا خلااااص .. كلها كام دقيقة واروح لعالم تاني .. اللي مخوفني إني أروح العالم ده ما القاش أي حاجة اتغيرت .. ألاقي ايدين بتشدني من أفايا على نار مالهاش أول من آخر
وبتعذب بلا أي هوادة ولا رحمة.
هنا بموت .. هناك مش هموت .. هنا عايز وهناك عايز
بس مش كل مرة على كيفي بقى .. ومن امتى اصلاً كانت كل حاجة على كيفي .. من امتى كان فيه حاجة واحدة بس على كيفي ؟؟
أنا واحد اتساب في وسط البحر وهو ما بيعرفش يعوم .. وعام .. وغلبه الموج و
ماغرقش .. ودخل في بطن السمك وطلع من ضهره .. بس السمك وبطنه مالهمش أخر
إيه بقى ، هكمل من الحياة دي ع الحياة التانية في نفس الموجة ؟؟ الموت بيكمل تفصيل توبه ؟؟ بيخونني يعني ؟؟ ...... وإيه يعني ؟! هي جات عليه !!
المهم .. حاولوا في دقيقة واحدة تلحقوني .. عايز اقولكم حاجات كتييير اوي
عايز أقولكم بحبكم لدرجة العشق والهوس .. بحس بيكم أوي .. دم أشعاري من حبل أوجاعكم وأفراحكم .. بمتحن وبدرس عشان أفيدكم .. اه والله مش بكدب في دي
حد ممكن يفكر اني اكدب وانا بموت؟ يمكن حد يقول إني بكدب عشان تجولي بسرعة .
عايز أحضن كل واحد فيكم حضن .. اللي هييجي أسرع هياخد حضن أكبر .
وعايز أعيط والله .. تعالوا بقى .
طب لو ماجيتوش .. ادعولي
وحاولوا تعيشوا كويس عشان انا هعيش هناك كويس لما تبقوا كويسين.
واوعوا تيجوا لو رجوعنا لبعض هيبقينا في نفس العذاب .
ولو اتأخرتوا ... بلاش ... أتمنى متتأخروش .
